Дар арафаи 35-солагии Истиқлоли давлатии Ҷумҳурии Тоҷикистон маросими тантанавии супоридани Ифтихорномаи Мақомоти иҷроияи ҳокимияти давлатии вилояти Суғд ба як гурӯҳ фаъолони хоҷагии халқи вилоят, аз ҷумла ба 7 нафар устодони Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд баргузор гардид.

Дар маросим Раиси вилояти Суғд Раҷаб Аҳмадзода иштирок намуда, ҳозиринро ба муносибати ҷашни 35-солагии Истиқлоли давлатии Ҷумҳурии Тоҷикистон самимона табрик намуд.

Таъкид гардид, ки Истиқлоли давлатӣ барои мардуми Тоҷикистон неъмати бузург буда, бо роҳбарии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаҳои гуногуни хоҷагии халқ рушд ёфта истодааст.

Зикр карда шуд, ки маҳз ба шарофати сиёсати созанда ва дурбинонаи Пешвои миллат муҳтарам Эмомалӣ Раҳмон имрӯз Тоҷикистон роҳи рушди устуворро тай намуда, дар тамоми гӯшаву канори кишвар корҳои созандагию бунёдкорӣ вусъат гирифтаанд. Дар вилояти Суғд низ ба шарофати фазои сулҳу субот ва татбиқи ҳадафҳои стратегии давлат рушди иқтисодию иҷтимоӣ таъмин гардида, барои беҳтар намудани сатҳи зиндагии мардум тадбирҳои зарурӣ амалӣ мешаванд.

Дар идомаи маросим ба гурӯҳи калони кормандони касбу кори гуногун ва фаъолони хоҷагии халқи вилоят, аз ҷумла аз ҷумла ба 7 нафар устодони Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд, ки дар пешрафти соҳаҳои мухталиф саҳми арзанда гузоштаанд, дар вазъияти тантанавӣ Ифтихорномаи Мақомоти иҷроияи ҳокимияти давлатии вилояти Суғд супорида шуд.

Бояд қайд намуд, ки бо пешниҳоди раёсати донишкада Мазбуд Холиқзода, муовини директор оид ба таълим, Насимҷон Камолов, декани факултети муҳандисӣ-технологӣ, Зӯҳро Умарова, декани факултети сохтмон ва нақлиёт, Хуршед Худойбердиев, профессори кафедраи барномарезӣ ва низомҳои иттилоотӣ, Наимҷон Рашидов, мудири кафедраи агротехнология ва экологияи саноат, Дадохон Ҷӯраев, мудири кафедраи таъмини барқ ва автоматика ва Ҷамшед Ғуфронзода, сардори маркази таҳсилоти фосилавӣ ба гирифтани Ифтихорномаи Мақомоти иҷроияи ҳокимияти давлатии вилояти Суғд шарафёб шуданд.

Метавон гуфт, ки чунин қадршиносӣ устодони донишкадаро барои фаъолияти минбаъда, меҳнати содиқона ва ташаббусҳои созанда рӯҳбаланд намуда, онҳо минбаъд низ тамоми донишу малака ва неруи худро барои ободии Ватан, таҳкими дастовардҳои Истиқлоли давлатӣ ва рушди минбаъдаи Тоҷикистони соҳибистиқлол равона хоҳанд кард.

Муборак бошад!

Шуъбаи иттилоот ва кор бо ВАО